هل تبقبش ؟ ... هل تعطي بقشيشاً ؟!!

تبقبش

ياية من الفعل tip

لإن كلمة tip هي اسم وفعل في الإنجليزية



*****

سفاري أفريقيا

المرشد أفريقي

كنت حاجز جولة للتعرف عن النباتات البرية

وفي الليل سفاري ليلي

وهو صادف أنه كان معي في كل الجولتين



في السفاري كانوا وياي في السيارة عائلة سويدية

وعطوه من ذاك البقشيش لما خلصنا

أنا نزلت ومشيت على الغرفة أو الاستقبال

وهو كان راجع بالسيارة

قالي

ترى هذي آخر مرة تشوفني !

أنا 

طيب فرصة سعيدة 




وفي اليوم الثاني

أيضاً كان هو المرشد حق السفاري العصر

شفنا أسد يالس بعيد

قتله ممكن نقرب منه ؟

قال

NO !!


يعني قالها كأنه رافض لطلبي مش عشان الأسد

تم شوية

وقعد يفسر عذر أقبح من ذنب


بعدها 

اللي وياي وكانوا فرنسيين

طلبوا منه يقربهم من الأسد

والله يحرك السيارة

ويصعد ذاك الطعس

ونتقرب من الأسد حتى مسافة قصيرة جداً لغاية أن الأسد كشر عن أنيابه !!


كل هذا الزعل عشان البقشيش !!



عجوز سواقة الباص - مطار سياتل

عمرها أعطيها فوق الـ 50

أنا شنطتي كان ثقيلة

أكثر من 20 كيلو

لما وصل باص المطار للفندق 

شفت العجيز تبي تشل الشنطة وتحطها في الباص 

قلت عنج يا بنت الحلال 

قالت أبد ما يصير


لما وصلنا الماطر

على ما أظن هي بعد نزلت الشنطة

قلت لها شكراً

لكن صدت وجهها عني !!


كل هذا الزعل عشان البقشيش !!



رحلة cosmos والبقشيش متضمن في السعر

اتصلت على المكتب في الإمارات

قتل لهم شو سالفة الـ 80$ زيادة في السعر ؟!!

قالوا هذا البقشيش حق السواق والمرشد

5$ حق كل واحد عن كل يوم

قتل لهم شو مشكلتي أنا تحطوهم في السعر ؟!!


قالوا

لإن المرشد والسواق رزقهم بس من البقشيش

والزوار اللي من الشرق ما يعطوهم بقشيش

فقررت الشركة تتضمنه في سعر الرحلة من البداية



مطار سريلانكا

لما طلعت من المطار

وأنا عندي شنطة صغيرة

إييني عامل ويسحب الشنطة بالقو من إيدي

بالغصب يبي يخدمني !!

لما وصلنا السيارة

ما عطيته شي 



bellboy في فندق تايلاند

وصل شنطنا الغرفة

ووقف عند الباب

قلناله روح شو تبى بعد 

والله ويعاند !!

ويقول أوه هوو !!

تم واقف عند الباب 


بالغصب يعني نعطيك بقشيش !!



السيلانية في حقول الشاي

قالي السواق

إذا العاملات طلبن منك فلوس لا تعطيهن


شكلهن وهن يقطعن الورق 

أوحتلي بصورة جميلة مثل اللي في الدعايات

فصورت وحدة منهن

فقالت لي

money ?

أنا هزيت راسي بالنفي


بس بعدين كل ما أتذكر السالفة

أحس بتأنيب الضمير

حسيت اني ما احترمت إنسانيتها 

شو بيضرني إذا عطيتها أقل القليل



في المطاعم أقرب رقم

إذا قيمة الفاتورة 58.20

أزود 1.8

عشان يكون الرقم حلو ومرتب يوم يطلع في كشف حساب البنك





بعض المطاعم تضيف الخدمة إلى الفاتورة

فما يحتاي تحطي أي شيء زيادة






المطاعم السريعة ما ياخذون بقشيش

ومن أمثالهم من ستاربكس وغيره



المرشد في باريس

كاتبين في موقعهم إن الجولة ببلاش

فلما سألت المرشد

من أسس الشركة هذي ؟

قال أنا 



لإنه ما كان فيه وظايف في فترة الركود 2009 فقررت أنشيء وظيفة

قتله

طيب ومين يدفع لكم ؟

قال احنا نعتمد على بقشيش السياح في كل جولة


عجبني اجتهاده

وعطيته 5 يورو

هي صح مجاناً

لكن إذا بنقارنها بجولات ثانية بتكون أرخص



تكاسي نيوزيلاندا ما ياخذون بقشيش

وعلى حسب ما قريت

البقشيش ممنوع في فيتنام والأرجنتين



طلبية بيتزا

إذا بطلب بيتزا للفندق

أقول للي وصل الطلبية

خذ الباقي



الاستعراضيون في الشوارع

آخر مرة تصورت مع كوبرا

هذيل رزقهم على البقشيش

إذا تميت اطالعهم واستمتعت بعرضهم

من الأولى تعطيهم بقشيش



السواق

إذا تم معي أكثر من يوم

عطيته بقشيش


ونفس قسمة شركة كوزموس

5$ عن كل يوم



الويترز في المطاعم

معاشهم زهيد جداً في بعض الدول

فـ البقشيش له قيمة كبيرة عندهم



في المطار

كنت متأخر وواحد خلص لي الإجراءات بسرعة

فـ عطيته 2$



في ناس البقشيش يحدث فرقاً في حياتهم

وخاصة الدول الفقيرة

مثل الهند



أنويها صدقة

أنا في السابق ما كنت أعطي بقشيش

بس مؤخراً

أدرجتها في عاداتي في السفر

*****

هنا موقع يغطي كل من يستحق ومن لا يستحق البقشيش

*****

سوالفكم عن البقشيش ؟!!

ما هي سياستك في البقشيش ؟!!