26.11.11

11 ... حالة من العالم حول حالات النصب والإحتيال والإستغلال والسرقة !!


مواضيعي الأخرى

قائمة بـ منتجات الخنزير في الخارج ... احذرها !!

برامج Michel Thomas لتعلم اللغات

*****





الواحد لما يسافر برع

همه السياحة والإستمتاع والراحة

لكن تمر عليه منغصات من إحتيال واستغلال

تعكر عليه جو الرحلة



هذي 11 من أكثر الحالات شيوعياً

لكن في البداية

نصيحة

الواحد يتوخى الحذر عند التعامل في الخارج

حتى 

لو كانت بطة وعيالها





1

تركيا

عربي في شارع تقسيم !





من أصل سوري


حدث هذا الموقف لخليجي وزوجته


سأله السوري بالتركية عن الوقت

رد عليه أنا ما أعرف تركي

قال آه أنته عربي


وتم يجرجره بالكلام

إلى أن اقتربوا من سكه

ويحط ذراعه بين ذراع الخليجي

ويسحبه إلى داخل السكه


وفي السكه ينتظرونه 4 أتراك

ضخام الجثة !!


قالوله

يا تعطينا إللي عندك

يا نوديك انته وزوجتك وكر دعارة

عطاهم وفك عمره منهم



المستفاد :

احذر الإستدراج

خلك في الأماكن العامة وين يتواجد الناس

لا تحسن النية في السفر وخاصة إذا طالت السوالف مع غريب



2

أمريكا اللاتينية

التاكسي والصراف الآلي





اللي يحدث أنه

السائح لما يركب التاكسي

يدخل عليه واحد في التاكسي

وتحت التهديد

يلزم على التاكسي يوديه عند أقرب صراف آلي

ويخلي السائح يسحب أكبر مبلغ ممكن من رصيده

وإذا أنتهى من هذا الصراف انتقل للصراف اللي بعده


طبعاً

سواق التاكسي يا أنه مغلوب على أمره

أو أنه شريك في العملية



3

أوساخ من السما

طاحت من طير من عمارة ...

المهم

يطلع لك فجأة واحد عنده منشفة

شوف الصدفة العجيبة 

أوه "سنيور "

ويجلس يمسح ملابسك

وفي ظل هذا التشويش

يكون شخص ثاني مخلص شغله وانتشل مقتنياتك !!


حركة مشابهة

هو صب أي شيء عليك بالغلط

كاتشب ، مايونيز ، عصير



4

تصادم وتشويش








سائح في مطعم

حاط كاميرته الغالية على الكرسي اللي جنبه

وييك النادل شايل أكل ويدعم الطاولة

ويطيح الأكل في الجهة البعيدة عن الكاميرا

يقوم صاحبنا يطالع شو السالفة

وفي هذه اللحظات البسيطة تختفي الكاميرا !!


أسلوب آخر

وهو استخدام عصا طويلة لسحب الشنط من تحت الطاولة



5

برشلونة

الشرطي المزيف





وغيرها من المدن العالمية

هذي الحيلة تاخذ أشكال كثيرة

مثلاً

شرطي واقف عند الصراف الآلي

أو

يطلب الجواز و المحفطة ويشرد

أو

يتهمك إنه عندك فلوس مزورة

واطلعله الفلوس وعاينهن ثم يرجعهن مرة ثانية

بعد ما سرق له كمن 100

أو

يوقفك لتفتيشك أو سيارتك

أونه يحبث عن مخدرات

وياخذ ما يريد بعد التشويش عليك من شرطي آخر

أو

أنه يضع مخدرات وهو يفتش

ويقول يا نخالفك الحين يا تعطينا فلوس

أو

أنه شرطي صدقي

بس يبا رشوة 


الحل

اطلب رؤيته هويته

خلك في مكان عام

اطلب رؤية شرطي آخر

اطلب الذهاب لقسم شرطة قريب

لا تركب معهم السيارة

تعرف على شكل ملابس الشرطة



6

باريس

خاتم الذهب





يلتقطه أمامك شخص من على الأرض

ويقول احنا شفناه مع بعض فلازم نتقاسم قيمته

يقولك خذ الخاتم بس عطني مقابل 

يبدأ معاك بـ 50 يورو وهكذا

هذي صورة الخاتم الحقيقية من النت



7

التكاسي




التكاسي في بعض البلدان

عندهم تخصص في استغلال السياح

مثل

تعطيه 10 وياخذها بسرعة ويقولك انته عطيتني 1 !! بدل العملتين

إذا أنت مستعجل ما راح تنتبه

أو

تعطيه 20 ويقول ما عندي كسر

أو

تعطيه 100 وبسرعه يبدلها بـ 100 مزورة

فيراويك إياها ويطلب 100 ثانية

أو

ما يشغل العداد أو أنه خربان

اتفق على السعر قبل ما تركب

أو

تبيه يوديك مكان يقولك هذا مسكر

وأنا أعرف مكان مماثل - ناس يعطونه عمولة

أو

يسألك هذي أول مرة لك في البلد

عشان ياخذ أطول درب للفندق



8

أمريكا

أ- اتصال الفجر





أو في وقت متأخر من الليل

اييك اتصال على غرفة الفندق

وانته في سابع نومه 

" نأسف على الإزعاج معاك الإستقبال ، ممكن رقم بطاقتك مرة ثانية "

" مشكور سيدي ، تصبح على خير "

المتصل من خارج الفندق


ب- ورقة بيتزا

تشوفها تحت الباب لما ترجع الغرفة

تتصل وتعطيهم بطاقة الإئتمان

لكن البيتزا لن تصل أبداً !!



جـ- تفتيش الغرفة

اثنين يدقون الباب

افتراضاً أنهم من عمال الفندق

واحد يكلمك والثاني يفتش ويسرق


د- مفتاح الغرفة

أنا مرة نسيت كرت الغرفة

فطلبت من الإستقبال يعطوني واحد غيره

الموظف عطاني كرت جديد من غير ما يسأل عن اسمي أوبطاقة تعريف !! 

افرض مثلاً واحد غيري طلب المفتاح مثل فلم





9

أندونيسيا

القرد الحرامي


 


القرد مدرب

ويوم يسرق ويندس في الغابة

يظهر واحد أونه يشتغل في المكان السياحي

ويقول لو تعطوني فلوس اشتريله موز

ممكن بعدها انزخه ونرجع أغراضكم



10

أمريكا الوسطى

تغيير العملة





تأخذ شكلين

الشكل الأول

يعطيك صرف العملة بالعكس

الشكل الثاني

في ناس تجلس عند الصرافات

ومعدل الصرف عندها أفضل من الصرافة

بس وهو يعد فلوسك قاعد يسحب من تحت كمن نوط

أو يستعجل ويروح بعد ما يعطيك ورق عادي مخشوش في النص



11

الدنمارك

مسرحية النصب





كما في الصورة

واحد يقلب كراتين كبريت تحتهن حجر


فصول المسرحية

تبدأ

أن أول المشتركين هم جزء من عملية النصب

وحده في كامل كشختها والثاني كأنه توه يشوفهم

واللي يحرك الكراتين يصيح بصوت كلما يربح حد

حتى واحد منهم يراوي الناس وهو يحط الفلوس في جيبه العلوي

I double 

حتى يتقرب أحد الأشخاص وعادة يكون من السياح

ويخسر بالطبع


الفصل الأخير من المسرحية

هو الإنذار بقدوم الشرطة

من باقي أفراد العصابة المتوزعين


يمد يده بالفلوس لك

كأنه أكيد وعلى أتم الإستعداد أنه يعطيك إياهن

هذه حركة لاحظتها عند نصابي الشوارع

يراويك إنه مستعد يعطيك الفلوس بالفعل إذا شاركت في اللعبة


أنا شايف واحد يراهن بـ 100 دولار 

وكل مرة يخسرها


*****

هذي بعض المواقف اللي واجهتني


1

تايلاند

الأبكم المسلم


جاني أنا وربيعي

وراوانا بطاقته

أونه مسلم وفاقد القدرة على الكلام

و أنا أأشر له إنته ما تروم تتكلم

وهو يشير بالسبابة أونه يحلف

عطيته فلوس

لكن السؤال ، ليش يانا احنا ؟!! 

ليش ما يطلب من الأجانب


موقف مشابه في أمريكا

أتمشى في مول

ويجيني واحد عربي

صومالي أو سوداني

ويكلمني وهو فرحان ومبتسم

" كيف حالك و شخبارك "

بعدين تتغير النبرة إلى هم وحزن

" والله يا أخوك أنا محتاج وعندي أسرة وعيال ... "

اللهم العالم إذا محتاج ولا نصاب

المشكلة في هالمواقف إنه الواحد يتذكر إنه من زمان ما تصدق

فيعطي هذا السائل حتى لو ما كان محتاج فعلاً



2

Jet Ski




في تايلاند بعد

كان راعي الجيتسكي مسلم

والتكلفة على ما أذكر 800 بات للساعة

فعطينها 1000 وقلنا لما نخلص ترد لنا الباقي

لعبنا وخمسنا

ويوم خلصنا قلناله رد لنا الباقي

قال لا !! 



إنتوا لعبتوا أكثر من ساعة


طيب ليش ما تخبرنا أو تأشر علينا 

والله يعلم إذا كانت أكثر من ساعة أو أقل

المحزن إنه مسلم ... توقعنا منه الصدق والأمانة



3

سريلانكا

أحجار كريمة وقمصان





عندما تذهب للدول الآسيوية

يأخذونك إلى أكثر من مكان عشان تشوف منتجاتهم

وإذا ما بغيت شي

يقولولك خذ على الأقل للذكرى شيء أو اثنين

عاد أنا قلت بخذ لي عشان ما أرجع سريلانكا

بس ما أستفدت منهم شيء 

أو حتى اهتميت

مرة أشوف الأحجار تحت التلفزيون

ومرة داخل شنطة

والقمصان لبستهم في سفرة ثانية

ومن بعدها ما شفتهم ! يمكن رميتهم


فالحين نادر جداً إني اشتري تذكار

يا دوب بطايق بوستكارد



4

بريطانيا

طباعة


ماشيء نصب هنا

لكن لما جبتها الإمارات ما لقيت لها حبر !






5

روسيا

سرقوا كاميرتي





في ماكدونالدز

تباً لهم 


لما طلعت من المطعم وشفت الشنطة مفتوحة

أشرلي واحد راحوا من هناك

ركضت شويه بعدين وقفت

هذا الأخير واحد من العصابة

الظاهر إنهم كانوا يراقبوني

وماكدونالدز كان زحمة

حسافة بس على الصور اللي راحت 

لكن واحد كندي في الرحلة أرسلي كل صوره على البريد 


آخر شياكة في السرقة

يجلسون في الفنادق والمطاعم

لبس محترم

يراقب الرايح والجاي

وينتظر اللحظة اللي يغفل فيها عن الحقائب

حتى يخرج من باب الفندق بكل هدوء وثقة


الظاهر سوق النشالين بيمشي عدل في كأس العالم 2018 في روسيا 



6

الغجريات في فرنسا

يلبسن لبس إسلامي

بحجاب

وممكن بعد يقولن السلام عليكم

الغريب أن حد منهن متينات

يعني مافي آثار للجوع 

اللبس لاستعطاف المسلمين

أمر ثاني

يعطون مخدر لعيالهم

عشان يوهمون الناس إنه راقد من الجوع والتعب


نص يورو

فيه ناس تطلب خردة يورو

نص على نص على نص ...

جمع ما يكفي حق بيرة أو شراب



7

انته تكره الأمريكان

دخل علي أمريكي في مطعم كنتاكي

في أفريقيا

قالي انته وين ساكن

قتله ليش تسألني 

قال هو وربعه طلعوا مع جروب سياحي

ونصبوا عليهم وسرقوا فلوسهم وجوازاتهم

ممكن تعطيني مبلغ كذا عشان أسير السفارة الأمريكية

قتله آسف ما أقدر

قال أنا مستعد أردهن لك باكر

قلته جداً سوري

قال أنته تكره الأمريكان ؟

قتله اشدخل السالفة في الموضوع 

اسمحلي I wish I could help you


ما أدري إذا هو نصاب ولا صدق محتاج

بس مرة ثانية إذا حصلي نفس الموقف

بدليه على مكتب استعلامات السياح 

ومناك يتصل على سفارتهم 



8

متحف نيويورك

نبهونا أنه ثمن الدخول 2$ وبس

بس واحد من الربع دفع 5$

لإنه الموظف قاله شيء وهو ما فهم عليه فرد عليه بـ يس <<< اللغة الإنجليزية في بداياته


أنا مسكت واحد من الطالعين

وقتله عطني العلامة على القميص مال التذكرة

ودخلت ابلاش 



9

لاس فيجاس

باص سياحي


السواق يشابه سنوب دووج

لكنه ما عطانا معلومات

بس اللهم

this is mirage hotel

this is ceasar palace


نفس شي في نيويورك

المرشد مرة يغني ومرة يقول أنا أتغدى في هالمطعم

هذا غير زحمة الباص

يعني تدفع لشيء وما تحصل من وراه فايدة أو معلومة



10

إيطاليا

سوار المعصم


حذرنا المرشد

إنه في ناس بتلف خيط على معصمك

يقولك كتجربة

بس ما تروم تفكه إلا بمقص

بعد ما يطلب منك فلوس



11

مصر

من أول يوم


أنا زيارتي لمصر كانت قصيرة

ومع ذلك ما سلمت من النصب

يمكن أول يوم مرتين

من تاكسي ومن مرشد في المتحف

وثاني يوم من كشك يبيع كولا

وفي الأهرامات

واحد يدفع باللعبة في إيدي

يعني خذها هدية ، بس بعدين أدري شو بيطلب 

بنغالي وزوجته دفعوهم دبل حق الخيل أو الحنطور


وآخر مرة ترانزيت طويل في مطار القاهرة

راعي التاكسي مصر اعطيه 10$

في البداية قال 50 جنيه ( يعني 10 $ )

بعدين قال خلاص خليها 36 جنيه

قتله 36 جنيه يعني كم بالدولار ؟

قال 10$ 

تلقائية عجيبة 

مع العلم أنه الفندق يبعد أقل من 5 دقائق عن المطار

*****


وفي الأخير

نصيحة

لا تشل الشنطة على ظهرك




خاصة في الأماكن المزدحمة


هذا موقع يتحدث عن النصب في أكثر من دولة


تعليقاتكم وتجاربكم

Related Posts Plugin for WordPress, Blogger...